Mera Khuda So Raha Hai, Urdu Nazam By Nusrat Zehra

جو یہ ناکامی میری روح تک میں۔۔۔۔

اپنے پنجے گاڑے بیٹھی ہے۔۔۔۔

سکون اب خواب میں بھی۔۔۔۔

ڈھونڈنے سے مل نہیں پاتا۔۔۔۔

میرے دشمن جو میرے نام کا کھاتے ہیں۔۔۔۔

ان کے وار کاری نجانے کب سے۔۔۔۔

میری زندگی میں چھید کرتے ہیں۔۔۔۔

میں دن بھر سانس لینے کو ترستی ہوں۔۔۔۔

میری رد بلا کی ہر دعا کے پروں کو۔۔۔۔

ہوا و ہوس کی ماری کاہنہ۔۔۔۔

کلیجہ کھانے والی فاحشہ۔۔۔۔

ہندہ کی طرح روز ایسے۔۔۔۔

نوچتی ہے کہ جیسے۔۔۔۔

میں کوئی بے دام غلام۔۔۔۔

اس کے لعنت یافتہ۔۔۔۔

گندے نظام زیست کی خاطر ہی جیتی ہوں۔۔۔۔

میں خالی راستوں میں۔۔۔۔

ادھ کھلی کھڑکی سے بس۔۔۔۔

دیکھا ہی کرتی ہوں۔۔۔۔

کہ شاید ایک دن ایسا بھی آئے گا۔۔۔۔

جو مجھ پر بند ہے۔۔۔۔

جینے کا دروازہ۔۔۔۔

اسے معجز نما ہاتھوں کی جنبش کھول پائے گی۔۔۔۔

میں حیراں ہوں کہ وہ۔۔۔۔

سب کچھ دیکھتا ہے،سن رہا ہے۔۔۔۔

اور پھر چپ ہے۔۔۔۔

نجانے کب وہ جاگے گا۔۔۔۔

نجانے کب فرشتے۔۔۔۔

اس کو میرے۔۔۔۔

نامۂ اعمال کی یہ۔۔۔۔

دکھ بھری کانٹوں بھری۔۔۔۔

بپتا سنائیں گے۔۔۔۔

مرے حصے میں اس نے۔۔۔۔

بس یہی لکھا۔۔۔۔

ہمیشہ وعدۂ فردا،ہمیشہ وعدۂ فردا۔۔۔۔