Ik Kahani Chiri Ik Fasana Bana Zindagi Lut Gayi Ap K Samne, Urdu Ghazal By Professor Rasheed Hasrat

اِک کہانی چِھڑی، اِک فسانہ بنا، زِندگی لُٹ گئی، آپ کے سامنے

میرا اپنا تھا جو، میرا اپنا نہیں، دوستی لُٹ گئی، آپ کے سامنے

یہ مُقدّر میں تھا، رو کے شب کاٹنا، قلب کُملا گیا، پُھول مُرجھا گیا

دیکھ لِیجے صنم، روشنی بُجھ گئی، چاندنی لُٹ گئی، آپ کے سامنے

جو کِسی کے لِیئے، زِندگی کو لگے، روگ اچّھا ھے کیا، سوچ لِیجے ذرا

ہاں میں کنگال تھا، کوئی ٹھگتا بھی کیا، سادگی لُٹ گئی، آپ کے سامنے

نرم آہٹ ھُوئی، سرد جھونکے چلے، دل مچلنے لگا، لوٹ آؤ صنم

تیری رُخصت سمے، رُوح میری بُجھی، بے بسی لُٹ گئی، آپ کے سامنے

میں نے سوچا جِسے، پِھر تراشا جِسے، اُس کو پاتا ھوں اب، کُچھ خیالوں میں گُم

کُچھ اُدھر بے بسی، کُچھ اِدھر مئے کشی، آس ہی لُٹ گئی، آپ کے سامنے

ھر طرف چھا گئیں، گھور تارِیکِیاں، راستے کھو گئے، منزِلیں چُھپ گئِیں

کیا کِسی سے کہُوں، میری قِسمت میں تھی، جو خُوشی لُٹ گئی آپ کے سامنے

جب بھی ابرُو کِھچے،تِیر چلتے رہے، ھم سُلگتے رہے، غم کی برسات میں

پِھر بھی تشنہ رہے، چشم و دل بان٘ورے، عاشقی لُٹ گئی، آپ کے سامنے

تھا تقاضہ یِہی، ھم سے حالات کا، ھم تھے خاموش سے اور سِسکتے رہے

کالے نینوں میں تھا، ہائے کیسا اثر، خامُشی لُٹ گئی، آپ کے سامنے

شِعر کہتا تھا جب، آپ کے حُسن پر، آپ کہتے نہ تھے، خُوب کہتے ھو تم

رو پڑے کِس لئے، آج حسرتؔ کی جب، شاعری لُٹ گئی، آپ کے سامنے