Gham E Mushtariq, Urdu Nazam By Professor Rasheed Hasrat

ابھی کل ھی مِلا ھے خط

اُداسی سے بھرا مُجھ کو

لِکھا ھے آپ نے خط میں

عجب ھے کیفیت دِل کی

عجب اِک بےقراری ھے

کبھی آنچل ڈھلکتا ھے

کبھی سِینہ سُلگتا ھے

مُسلسل ہیں رواں آنسو

تِرے وُہ خط کبھی پڑھ کر

تسلّی دِل کو دیتی ھوں

کہ تُو ایسا نہِیں ھرگِز

ھمارا رُوح کا رِشتہ

ھے پاکِیزہ، مُقدّس ھے

نجانے کِس لِیئے پِھر بھی

مِرا دِل ڈُوب جاتا ھے

اُداسی رات بھر مُجھ کو

کبھی سونے نہِیں دیتی

تصوُّر ہی تِرا دِل سے

جُدا ھونے نہِیں پاتا

یہ حالت تب سے ھے میری

کہ جب سے اِک سہیلی نے

،بتایا ھے کہ اب تیری

میری راہیں جُدا ھوں گی

،تُجھے مُجھ سے

مُجھے تُجھ سے

جُدا کر دے گی یہ دُنیا

کبھی مِلنے نہیں دے گی

،ھماری زِندگی میں تلخِیاں

ھوں گی،شرارے بھی

جو قسمیں پیار کی کھائِیں

جو وعدے تھے وفاؤں کے

 تمنّا، حسرتیں جو آرزُو کے خواب دیکھے تھے

سبھی کُچھ خاک ھو گا اب۔

تو حاضِر ھے جواب اِس کا

جو حالت تُم نے لِکھ دی ھے

وُہی مُجھ پر گُزرتی ھے

تُمہیں اب کِس طرح  لِکھ دُوں

مِرا دِن کیسے کٹتا ھے

اُداسی رات بھر مُجھ کو

یہاں سُلگاتی رہتی ھے

مِرے گھر کے در و دِیوار

پر ھے عکس تیرا ھی۔

کبھی یہ جی میں آتی ھے

شہر یہ چھوڑ جاؤں میں

،یہ گھر، یہ بہن بھائی

سارے بندھن توڑ جاؤں میں

کِسی ایسی جگہ جاؤں

جہاں کوئی نہ ھو دُشمن

وفاؤں کا مُحبّت کا۔

تُمہیں اپنی قسم جانم

خُدا کے واسطے اپنے

یہ آنسُو پُونچھ لِیجے گا

کِسی پہ راز اُلفت کا

عیاں ھونے نہِیں دُوں گا

زباں جو گُنگ ھے میری

بیاں ھونے نہِیں دُوں گا

میں اپنے ھونٹ سِی لُوں گا

زہر پی پی کے جی لُوں گا۔

مگر اُلفت نہ ھو رُسوا

مُحبّت ھو امر اپنی

عقِیدت ھو امر اپنی