Shaheed E Jamhoriyat Qazi Wali Mohammad K Naam, Urdu Nazam By Professor Rasheed Hasrat

جُرم کیا تھا، راست گوئی، حق شناسی یا خلوص؟؟؟

یا مُرّوت، جو غرِیبوں کے لِیئے تھی بِالخصوص؟

ظُلم و اِستبداد کی اِس سر پِھری برسات میں

روشنی کا ایک پرچم لے چلے تُم رات میں

کس لِیئے بے داد گر نے قتل کر ڈالا تُمہیں

ماں تو پہنانے چلی تھی پیار مالا تُمہیں

تُم کو راس آیا نہ یہ صدیوں کا فرسُودہ نِظام

حق کا جھنڈا لے کے تُم لینے چلے پِھر اِنتقام

پاٹ میں سرمائے کی چکّی کے پِس جاؤ گے تُم

جانتے تھے ھم کہ سچ سے باز نہ آؤ گے تُم

پِھر شعُور و آگہی پہ تِیرگی کرتی ھے وار

شمع حق پر نوجواں کرتا ھے اپنی جاں نِثار

گِڑ گِڑا کر زِندگی کی بِھیک بھی مانگی نہِیں

اِس طرح کی زِیست تُم کو چاہِیئے بھی تھی نہِیں

تُم کہ دھقاں کی صدا تھے اور مزدُوروں کی جان  کب تلک جاگِیرداروں کی رہے گی جُھوٹی شان

عِلم و عِرفاں کے، ادب کے، فن کے دِلدارہ تھے تُم

بے کسوں کی دستگِیری پر بھی آمادہ تھے تُم

ایک دن سرمایہ داروں پر بھی آئے گا زوال

بُھوک سے افلاس کے ماروں کا جو ابتر ھے حال

حق و باطل کے معرکے میں ھُوئے تُم سُرخرُو

رائیگاں جاتا نہِیں ایسے شہِیدوں کا لہُو

چھٹ چلی ھے چہرۂِ حالات سے رسموں کی دُھول

کوئی دِن بس پُھوٹنے والے ہیں خُوشحالی کے پُھول

تُم نے تو قاضی ولیؔ ھم کو جگایا نِیند سے

ورنہ حسرتؔ ظُلم و اِستبداد کے جنگل میں تھے