Nazm By Aamir Souqi

عنوان دہائی

ہم نے مانا کہ گناہوں کے سبب ہیں یہ عذاب

پھر بھی معبودِ حقیقی ترے بندے ہم ہیں

چشمِ رحمت سے ہمیں دیکھ گناہوں کو نہ دیکھ

تیرے سنسار میں حالات کے مارے ہم ہیں

جسمِ مظلوم پہ ظالم کے یہ زخموں کے نشاں

خون کے آنسو ان آنکھوں سے بہیں گے کب تک

کچھ تو میعاد ستمگر کی بھی ہوگی مولی

ہم پہ یہ ظلم و ستم ہوتے رہیں گے کب تک

تیرے ہی لطف سے قائم ہے شبابِ امّت

تو ہی خلاقِ دوعالم ہے تو ہی سب کا خدا

اپنی رودادِ الم کس کو سنائیں جاکر

اک تو ہی اپنا ہے اور کوئی نہیں تیرے سوا

سُن لے مظلوم کی فریادِ شکستہ پائی

تجھ سے امید لگائے ہوئے ہیں جان و جگر

ظلم و وحشت کی ہر اک سمت صف آرائی ہے

کوئی تو شوکتِ امّت کا سبب پیدا کر

تو نے ہی نیل میں فرعون کو غرقاب کیا

نارِ نمرود کو گلزار بنایا تو نے

شِکَمِ ماہی میں یونس کو جلانے والے

کشتیِ نوح کو ساحل سے لگایا تو نے

آنکھ میں اشکِ ندامت بھی ہے فریاد بھی ہے

اب ہماری بھی طرف چشمِ عنایت کر دے

ہے دہائی دلِ شوقی کی خدائے برتر

نیست نابود ستمگر کی حکومت کر دے