Howa Kehti Rahi Ao, Urdu Nazam By Wazir Agha

ہوا کہتی رہی آؤ

چلو اس شاخ کو چھو لیں

ادھر اس پیڑ کے پتوں میں چھپ کر تالیاں پیٹیں

گریں اٹھیں لڑھک کر نہر میں اتریں نہائیں

مخملیں سبزے یہ ننگے پاؤں چل کر دور تک جائیں

ہوا کہتی رہی آؤ

مگر میں خشک چھاگل اپنے دانتوں میں دبائے

پیاس کی برہم سپہ سے لڑ رہا تھا میں کہاں جاتا

مجھے سورج کے رتھ سے آتشیں تیروں کا آنا

اور چھاگل سے ہمک کر آب کا گرنا

کسی بچے کا رونا اور پانی مانگنا بھولا نہیں تھا میں کہاں جاتا

میں اپنے ہاتھ کی ابھری رگوں میں قید

اپنی آنکھ کی تپتی ہوئی خاک سیہ میں جذب تھا یکسر

مجھے اک جرعۂ آب صفا درکار تھا اور میرے بچے نے

صدا دی تھی مجھے آؤ خدارا اب تو آ جاؤ

کہ میرے ہونٹ اب پھٹ بھی چکے

آنکھوں کا امرت سوکھ کر بادل بنا اڑ بھی گیا

ہوا کہتی رہی آؤ

یہ بندھن توڑ دو پیارے

مگر میں ہاتھ کی ابھری رگوں میں قید

اپنی آنکھ کی تپتی ہوئی خاک سیہ میں جذب کیا کرتا

کہاں جاتا