Ajab Din Thay Woh, Urdu Nazam By Wazir Agha

عجب دن تھے وہ

جھاڑیاں آگ کے جھنڈ کائی زدہ تال

جن کے کنارے ہزاروں برس سے کھڑے

جنڈ اور ون کے ڈھانچے

پھلائی کے پھرواں کے جنگل جو دھرتی پہ بچھ سے گئے تھے

اداسی ہوا بن کے پھرتی تھی

اور سنت سادھو

پرانے درختوں کے نیچے بچھی گھاس پر

آلتی پالتی مار کر بیٹھتے تھے

خود اپنے ہی اندر کے تاریک جنگل کا حصہ بنے تھے

عجب دن تھے وہ

جب بھی کچھ کہنا چاہا

گھسے مردہ لفظوں کی کوئی کمک تک نہ آئی

جو آئی تو پھر ہونٹ سل سے گئے

اور آنکھیں

نہ کہہ سکنے کے کرب میں مبتلا ہو کے

اپنے ہی حلقوں سے باہر نکل آئیں رسنے لگیں

اور پھر ایک دن

اونچے نیچے پہاڑوں سے ہوتا ہوا وہ

یہاں آ کے ٹھہرا

یہاں آ کے اس نے

معمر ترین ون کے نیچے وہ شعلہ جگایا

کہ جس میں بھسم ہو گئے سب یہ ون جھنڈ پھرواں پھلائی

ہوا ہو گئے سنت سادھو کٹی جھاڑیاں

اور کائی زدہ تال دھرتی کے ناسور

اب ان کا نام و نشاں بھی نہیں تھا

تب اس نے

مقدس عصا سے وہ جادو جگایا کہ ساری فضا سیل انوار میں بہہ گئی

گھونسلوں اور پھولوں میں ڈھلتی گئی یہ زمیں

چہچہوں خوشبوؤں سے ہوا اٹ گئی

آج وہ لوٹ کر جا چکا ہے

تو پھر کالی دھرتی کے اندر سے آگ آئے ہیں

جنڈ کے پیڑ کانٹوں بھری جھاڑیاں

پھر سے رسنے لگے ہیں

وہ کائی زدہ تال

جن کے اندر سے

منحوس سادھو نکل کر کناروں پہ بیٹھے ہوئے ہیں

اداسی ہوا بن کے پھرنے لگی ہے

کسی نے الاؤ پہ بھاری قدم کیا رکھا ہے

اندھیرے کا بوجھل سا پٹ کھل گیا ہے

فضا بجھ گئی ہے

فضا بجھ گئی ہے

مگر کور آنکھوں کو کیسے دکھاؤں

کہ اس بھاری پاؤں کے نیچے

اندھیرے کے بوجھل سے اس پٹ کے پیچھے

کرن اپنے بستوں پہ لپٹی ہوئی ہے

سنہری سے اک بیج میں سو رہی ہے