LuT Rahi Hai Daulat-e-didar Qiasar-bagh Mein, Urdu Ghazal By Arshad Ali Khan Qalaq

luT rahi hai daulat-e-didar qiasar-bagh mein
misl-e-gul sab ho gae zardar qaisar-bagh mein

dekhte hain yar ka paDhta hai kalima kaun kaun
jama hain sab kafir-o-dinda qiasar-bagh mein

hum se aankh us ne laDai tewri badli ghair ne
chalte chalte rah gai talwar qiasar-bagh mein

us kaman-e-abru ne kin dil par nazar-andaziyan
hum pe tiron ki hui bauchhaar qiasar-bagh mein

gate hain murghan-e-gulshan peng deti hai sada
jabki jhula jhulta hai yar qiasar-bagh mein

be-KHudi chhai hui hai ye sharab-e-aish ki
mast do bahar paDe hain chaar qiasar-bagh mein

yan hawa mein hai dam-e-isa ka aalam kya ajab
pae sehat nargis-e-bimar qiasar-bagh mein

main to kya hote hain gul bhi kushta-e-tegh-e-KHiram
banki tirchhi chalte ho raftar qaisar-bagh mein

jalwa-afgan nur ke hain phul phal tuba ki tarf
KHuld se mangwae hain ashjar qiasar-bagh mein

ab to ai rashk-e-chaman surat dikhana chahiye
nala-kash hai andalib-e-zar qiasar-bagh mein

wo na the pahlu mein to us ne bhi ki pahlu-tahi
mujh se dil mein dil se tha bezar qiasar-bagh mein

daur-e-ishrat hai ye zoron par hain mai-kash kya ajab
mohtasib ki chhin len dastar qiasar-bagh mein

aamad aamad hai salami ko hamare shah ki
hain jawanan-e-chaman tayyar qiasar-bagh mein

mohtasib ke hath se tang is qadar hain ai 'qalaq'
aae hain nalish ko sab mai-KHwar qiasar-bagh mein