Zindagi Uljhi Hai Bikhre Hue Gesu Ki Tarhaan, Urdu Ghazal By Asra Rizvi

زندگی الجھی ہے بکھرے ہوئے گیسو کی طرح

غم پیے جاتے ہیں امڈے ہوئے آنسو کی طرح

آج وحشت کا یہ عالم ہے کہ ہر انساں ہے

دشت تجرید کے بھاگے ہوئے آہو کی طرح

ظلم کا آگ اگلتا ہوا سورج سر پر

تپش درد سے ہر سانس ہے اب لو کی طرح

ہے گلستاں میں تری گل بدنی کا شہرا

کاش تو گزرے ادھر سے کبھی خوشبو کی طرح

اسی امید پہ آئینۂ دل دھوتے ہیں

منعکس ہو کوئی صورت مرے مہ رو کی طرح

شب فرقت میں بھی تنہائی میسر نہ ہوئی

لاکھ غم گھیرے رہے مجھ کو جفا جو کی طرح

بے دلی شرط ملاقات ہے تو یوں ہی سہی

ہم ترے شہر میں اب آئیں گے سادھو کی طرح

ڈوبنے لگتی ہے جب رنگ کے سیلاب میں آنکھ

یاد تب اس کی بچا لیتی ہے جادو کی طرح

سرزنش بھی تری بنتی ہے سہارا میرا

راہ دشوار میں پھیلے ہوئے بازو کی طرح

لذت دہر میں گم ہوتا ہے جب دل اسریٰؔ

تب کسک اٹھتا ہے وہ درد کے پہلو کی طرح