Kissi Barish Ki Khawahish Main, Urdu Nazam By Fakhra Noreen

کسی بارش کی خواہش میں

بدن بھٹی ہوا ہے سانس کے جھکڑ اڑا ئے جاتے ہیں سدھ بدھ،

تمازت مستقل اتنی کہ تن پگھلائے جاتی ہے

مری آنکھوں میں اک میٹھی اگن ہے اور

پپوٹے اک عجب سے بوجھ کے نیچے دبے جاتے ہیں،

کانوں میں مدھر سرگوشیاں کرتا ہے جانے کون،

جن سرگوشیوں کے سرخ سندیسوں سے شریانوں میں ٹھہرا خون چہرے پر سمٹتا ہے، تو

آنکھیں بند ہوتی، ہونٹ کھلتے ہیں،

بدن صحرا ہوا ہے العطش کی وہ صدائیں ہیں کہ

جن کی گونج میرے ہوش اڑاتی ہے

طنابیں خیمہ جذبات کی ہاتھوں سے چھٹ سکنے کا ڈر گھیرے میں لیتا ہے،

،کسی آوارہ بادل سے

کسی چھاگل سے دوبوندیں چرانے اور

تن سیراب کرنے کی عجب سی آرزو سینے کے اندر سرسراتی ہے،

مگر میں کوڑیالے سانپ سے ڈرتی ہوں

جس کا کاٹا پھر پا نی طلب کرنے کی مہلت پا نہیں سکتا،

وہ عالم ہے کہ قوت لایموتی حق کا استعمال واجب ہے

مگر میرے بدن کے میگھ راجا تو نے میرے ہاتھ باندھے ہیں

بدن کی چیخ پر لبیک کہہ ،مجھ پر برس ،

او میگھنا کے دیوتا مجھ پربر س

تری برسات کی امید میں یہ ٹھیکرا جب کھنکھناتا ہے

تو پیاسی خاک کی تسکین پر کاریز کی آمادگی

صرفِ نظر کرنے نہیں دیتی