Besukhan Darichoon Se, Urdu Nazam By Fareeha Naqvi

یاد ھے میں نے تم سے کہا تھا

میرا ھر سُخن تم سے ھے.

دیکھ لو ، چھ مہینے سے اب تک.

کسی نظم کی ، کوئی ھلکی سی آھٹ بھی

دل کے دریچے پہ ، دستک نہیں دے سکی ھے

مگر اب میں اِس سے زیادہ

دعاؤں میں تم کو نہیں مانگ سکتی.

خدا اتنا فارغ نہیں ھے

کہ سب چھوڑ کر ، صِرف ھم کو ملانے کی خاطر

زمانے میں ”کُن“ کی صدائیں لگاتا پھرے.

اُس کی دنیا میں

بس ھم ھی نہیں ، اور بھی لوگ ھیں۔

اور وہ دنیا جو ھم نے بنائی تھی

اُس میں فقط ھم ھی تھے

وقت کا اژدھا میری ٹین ایج کی

ساری معصومیت کو نگلنے لگا ھے

خدا اور رحمت کا نقشہ

جو بچپن میں اَماں نے کھینچا تھا

یکسر بدلنے لگا ھے

کہیں دُور سے ، پھر تمہاری صدا آرھی ھے

مگر دل یہ کہتا ھے

بس اب نہیں.......خامشی چاھیے.

(اور تم جانتے ھو، میں دِل کی سنوں گی)

یہ کیا ھے کہ

جب آنکھیں موندوں تو رنگ اور منظر

مگر آنکھیں کھولوں تو ھر سُو اندھیرا ھے

خیر....

آج کتنے دنوں بعد تم سے

یہ سب دل کی باتیں کہی ھیں.

میری بیقراری کسی غیر محسُوس سانچے میں

دھیرے سے ڈھلنے لگی ھے

مہینوں سے دل کے جزیرے پہ

جو برف چھائی تھی ، آخر پگھلنے لگی ھے۔

کوئی نظم پھر مجھ میں ، چلنے لگی ھے