Hum Dekhte Hain Un Ki Taraf Bar Bar Kiyon, Urdu Ghazal By Fazal Husain Sabir

ہم دیکھتے ہیں ان کی طرف بار بار کیوں

اپنی نظر پہ ہم کو نہیں اختیار کیوں

وہ مجھ سے پوچھتے ہیں کہ ہو بے قرار کیوں

میں ان سے پوچھتا ہوں کہ ہو طرحدار کیوں

دریا بہا رہی تو اے چشم زار کیوں

دم بھر بھی ٹوٹتا نہیں اشکوں کا تار کیوں

تم مجھ پہ ڈھا رہے ہو ستم بار بار کیوں

آخر رلا رہے ہو مجھے زار زار کیوں

پژمردہ ہوتے جاتے ہیں گلہائے داغ دل

آتی نہیں چمن میں ہمارے بہار کیوں

کیا پھونک کر رہے گی مرے آشیانے کو

بجلی لپک رہی ہے ادھر بار بار کیوں

وعدہ ہی وعدہ تھا نہ وہ آئے نہ آئیں گے

اے چشم آرزو ہے تجھے انتظار کیوں

اپنی نظر سے پوچھئے حال دل حزیں

بے اختیار کیوں ہے نہیں اختیار کیوں

جب تیری رحمتوں کا نہیں ہے کوئی شمار

عصیاں کا میرے ہوتا ہے یا رب شمار کیوں

کیا ہیں کسی کے گیسوئے مشکیں کھلے ہوئے

ہے گلشن جہاں کی فضا عطر بار کیوں

اپنی طرح مجھے بھی کرے گی تمام کیا

تڑپا رہی ہے مجھ کو شب انتظار کیوں

ہیں یوں تو طرحدار زمانے میں اور بھی

لیکن ہے آپ ہی پہ زمانہ نثار کیوں

زخمی ہیں دونوں کیا ترے تیر نگاہ کے

دل میں خلش ہے اور جگر داغدار کیوں

صابرؔ کی زندگی میں تو پوچھا نہ آپ نے

مرنے کے بعد پوچھ رہے ہیں مزار کیوں