Tumhaare Dekhne Ko Hasrat-e-hairat-faza Thahri, Urdu Ghazal By Jameela Khuda Bakhsh

tumhaare dekhne ko hasrat-e-hairat-faza Thahri
dil-e-mahzun se nikli dida-e-bismil mein aa Thahri

tasawwur yar ka tha samne aati qaza kyun kar
sar-e-baalin dam-e-murdan ba-shakl-e-dil-ruba Thahri

jhukaya bar-e-isyan ne hamare dast-e-hasrat ko
pahunch kar ta-ba-lab jis ki nadamat se dua Thahri

tumhaari jumbish-e-abru se ghayal ho gae aashiq
ban aai jaan par un ki tumhaari ek ada Thahri

usi andaz ne viran kiya hai mere pahlu ko
dil-e-ashiq ke lene ko in aankhon mein ziya Thahri

saba ke tez jhonkon ne phiraya dar-ba-dar us ko
zamin par chain se kis dam ye KHak-e-mubtala Thahri

jalaya muskura kar aur ada se kar diya murda
kahin to ye jafa Thahri kisi ja par wafa Thahri

basan-e-KHun-e-dil chaspan hui hai tere talwon se
hamari dushman-e-jaan ab ye shoKHi-e-ziya Thahri

ilahi kya mere dilbar ne khola apne gesu ko
masham-e-jaan mein apne aa ke bu-e-jaan-fiza Thahri

tumhaari bad-dua se lutf milta hai mere dil ko
main aashiq hun tumhaara wo mere haq mein dua Thahri

farishton ne pukara ai 'jamila' jald hazir ho
KHuda ke ru-ba-ru aa kar saf-e-ahl-e-safa Thahri