Waqt-e-mushkil Hai Pa Ye Waqt Guzar Jaega, Urdu Ghazal By Mohammad Ibrahim Noori

waqt-e-mushkil hai pa ye waqt guzar jaega
yar-o-aghyar ka han faisla kar jaega

Thokaren gardish-e-ayyam ki gar khaega
pyar ka bhut tere sar se utar jaega

kab talak zabt karega bhala suraj ki tapish
phul to phul hai ek roz bikhar jaega

muddaton baad bhi zinda hai bichhaD kar mujh se
bin mere us ne kaha tha ki wo mar jaega

shiddat-e-ishq-o-mohabbat mein kami aaegi
yar ki did ko tu roz agar jaega

rakh ke aadab-e-dua pesh-e-nazar ai dai
tu dua kar tera daman abhi bhar jaega

aaega aisa bura waqt bhi socha hi tha
bechte apna hunar ahl-e-hunar jaega

jaane ghar walon ko kis darja masarrat hogi
subh ka bhula agar sham ko ghar jaega

tujh ko ho jaegi duniya ki haqiqat malum
jab janaza tera marqad mein utar jaega

zindagi mein to palaT kar use dekha hi nahin
bahar-e-tadfin magar sara nagar jaega

ishq-e-mahbub ki lazzat ho mayassar jis ko
janib-e-dar bhi be-KHauf-o-KHatar jaega

faisla hoga adalat mein usi ke haq mein
bahr-e-qazi jo liye kisa-e-zar jaega

dur se pani lagega pa na hoga pani
tishna-lab dasht mein jis samt bhi gar jaega