Hai Chashm E Mustafa Mein Woh Insaan Gira Hua, Urdu Ghazal By Syed Iqbal Rizvi Sharib

بیتِ حسن تھا نور سے ہر سو بھرا ہوا

نرجس کو جب محمّدِ آخر عطا ہوا

حبِّ علی سے جام مرا ہے بھرا ہوا

چودہ ملا کے پی تو وہی ذائقہ ہوا

اک منتظَر سے میرا عجب سلسلہ ہوا

رکھا ہے انتظار سے خود کو بندھا ہوا

بغضِ علی کا زہر ہے جس میں بھرا ہوا

ہے چشمِ مصطفیٰ میں وہ انساں گرا ہوا

صدیوں کی ظلمتوں سے بشر کب رہا ہوا

ہے اب بھی جھوٹ و مکر میں انساں پھنسا ہوا

حسن و جمال یوسفِ کنعاں پہ تھا کمال

مہدی کو حسن ان سے سوا ہی عطا ہوا

قد بھی میانہ عمر بھی اور رنگ گندمی

چہرے پہ تل ہے جیسے ستارہ ٹَکا ہوا

سینہ کشادہ کاندھے کھلے دانت خوب رو

اور پشت پر نشانِ امامت بنا ہوا

ہادی نبی رسول سبھی آ چکے مگر

طاغوت ہی ہے کتنوں کا رہبر بنا ہوا

غاصب ہماری نظروں کو بھایا نہیں کبھی

کچھ لوگوں کی ہے آنکھوں کا تارا بنا ہوا

گر منتظر ہو دل سے تو آئیں گے وہ ضرور

"رہنے دو انتظار کے در کو کھلا ہوا"

حُر کی ذرا یقین کی منزل تو دیکھئے

شفقت پہ شہ کی کتنا تھا تکیہ کیا ہوا

فکرِ رسا جو خوب چلی رب کی ہے عطا

کچھ اور ہم سے اجرِ رسالت ادا ہوا

محفل "طرح" کی اب کے جو کچھ ملتوی ہوئی

شارب نے یہ کلام ہے کہہ کر رکھا ہوا