Poocha Lehekte Pair Se Bulbul Ne Kaan Mein By Zeeshan Ahmad Zaki

پوچھا لہکتے پیڑ سے بلبل نے کان میں

یہ کیا سلیقہ آ گیا ، حضرتِ انسان میں

یہ اِس کو جامِ آشتی کس نے پلا دیا

اِس کا غرور خاک میں کس نے ملا دیا

بولو تو اِس کے ظلم میں تخفیف کیسے ہو گئی

یہ شرفِ مخلوقات اب نحیف کیسے ہو گئی

معصوم بچوں کے درندہ صفت قاتل کیا ہوئے

یہ دیکھ کر بھی جی رہے تھے جتنے بے دِل، کیا ہوئے

اب کیوں فضا میں بیٹیوں کی چیخ سنتی ہی نہیں

اب اِس کی آہیں کیوں بتا تاریخ سنتی ہی نہیں

یہ پھول ، خوشبو، رنگ اِس کے خوف سے آزاد ہیں

اب طائروں کی چہچہاہٹ سے شجر آباد ہیں

کیوں زہر پھیلاتے ہوئے سب کارخانے بند ہیں

وہ بھوک کے پہلو میں بجتے شادیانے بند ہیں

اب اور کتنے دن چلے گا خوف جو طاری ہوا

جو لفظ خنجر ہو گئے ، جو لہجہ بازاری ہوا

چپ چاپ سنتا ہی رہا بلبل کی ساری گفتگو

پھر پیڑ گویا یوں ہوا، اے بلبلِ خوش رنگ تُو

میں جانتا ہوں دردِ انسانی میں ہو کے مبتلا

یوں گلستاں میں کر رہی ہے ساری باتیں جابجا

اپنے بڑوں سے میں نے سن رکھے ہیں ان کے کام بھی

انسان اچھے ہیں زیادہ کچھ ذرا دشنام بھی

تسلیم کہ تیرا ہراک شکوہ بجا ہے، ٹھیک ہے

لیکن سنو! اللہ میاں شہہ رگ سے بھی نزدیک ہے

یہ خوفِ مرض اِن کو ساری غلطیاں بتلائے گا

توبہ کا در کُھلا ہے اِن کو بس یہی دکھلائے گا

فرعون اور نمرود کے انجام سے واقف ہیں یہ

میں جانتا ہوں کربلا کی شام سے واقف ہیں یہ

اک سرزنش ہے جس کے بعد یہ وبا ٹل جائے گی

پھرحضرتِ انسان پہ اک تازہ رونق آئے گی

یہ جس نبیﷺ کے نام لیوا ہیں، بچائے جائیں گے

یہ پھر صراطِ مستقیم پر ہی لائے جائیں گے

مشرق و مغرب میں ان کا دور آخر آئے گا

کلمۂِ حق کا یہ پرچم ہر جگہ لہرائے گا

سن کے بلبل نے کہا، واللہ یہ سب ٹھیک ہے

نبی آخرﷺ کا خدا شہ رگ سے بھی نزدیک ہے