Waqt Majboor Hai, Urdu Marsiya By Fakhra Noreen

وقت مجبور ہے

فاخرہ نورین

ریت بہتے ہوئے وقت جیسی تبہ کاریوں کے لیے خاص بدنام ہے

استعارہ ہے انسان کی بے بسی کے لیے

بھربھری ریت ہو، وقت ہو

بند مٹھی سے پھسلیں تو

خالی ہتھیلی بڑی رائیگانی کی تصویر ہے

ریت اور وقت کی خو میں ہے،یہ مٹا دیتے ہیں

نقش کوئی بھی ہو،نام کیسا بھی ہو

نقش بر ریگ بھی نقش بر آب جیسا فنا یافتہ

ہاں مگر ایک پل!

ایک پل آج بھی ہے زمانوں سے ٹھہرا ہوا

ریت بننے چلی قتل گاہِ جنوں تو اسے منہ کی کھانی پڑی

گرد ہونا پڑا

وقت اپنی روانی میں خیمہ گہہِ جذب و مستی بہا نہ سکا

اور پتھرا گیا

وقت مجبور ہے اس میں ہمت نہیں

اہلِ بیتِ نبی و محبان کے نامِ نامی مٹائے

ریت معذور ہے،دسترس ہی نہیں

کربلا سے حسین ابنِ حیدر کے سجدے کا نقشِ دوامی مٹائے