Uff Yeh Muhabbat, Urdu Nazam By Safia Hayat

محبت کا کوئی فرقہ

کوئی مذہب نہیں ھوتا

یہ تو ھونی ھے

ھو کر رہتی ھے

یہ رنگ ،نسل ، خطہ سے بے نیاز

قومیت کو فوقیت دیے بغیر

دلوں کو بھنور کے گھنجلوں میں الجھا کے

آنکھوں کی گزرگاہوں سے سفر کرتی

سرحدوں کی خاردار جھاڑیوں سے ھوتی

میلوں دور بیٹھے

دو جسموں میں قید

روحوں کو پل بھر میں ملا کر

وصل لمحوں کی شراب کا نشہ چکھا دیتی ھے۔

کبھی یہ اتفاق کا پرندہ بن کر

انوکھی چال چلتی ھے۔

ڈوبتی سانسوں کے زیر وبم سے

کیا کیا نغمے گاتی

وقت کی قید سے پرے

ھجر کی آگ میں خاک ھوتے

تڑپتے سسکتے

محبت کا ہر ذائقہ چکھتے بدن کو

ملن کی راہ تکتے تکتے ہلکان کر دیتی ھے۔

مگر محبت ذات سے کائنات کاسفر

طے کرتے کبھی نہیں تھکتی

ذرا ذرا سی سلگتی

سرشار لمحوں کو غنودگی میں ڈبوتی

نیلے آکاش کو بازوءوں میں بھر کر

دنیا کے مناظر میں

کیا سے کیا رنگ بھرتی ھے۔

اف یہ محبت ! ایسی بلا کافر

کہ مل جائے تو نشہ اور

نہ ملے تو

جینا کیا پھر مرنا کیا۔۔۔؟