تیر و ترکش

#ملک میں امن کا فائدہ عوام کو پہنچنا چاہیے، آرمی چیف
اگر کوئی عقل مند ہے تو اسے اشارہ کافی ہونا چاہیے چیف صاحب کا!
#اب آپ حکومت میں ہیں، اپوزیشن میں نہیں، گھسی پٹی بات نہ کریں، عمران خان کی وزراء کو ہدایت
اس ہدایت پر عمل کی ابتداء وزیراعظم ہاوٴس سے کرنے کی ضرورت ہے۔
#نوازشریف سے ڈیل کا مجھے علم نہیں، شاہ محمود قریشی
حالانکہ وزیر ”خارجہ“ آپ ہیں۔

#کسی کے ساتھ این آر او نہیں ہوگا، افتخاردرانی معاون خصوصی وزیراعظم
پہلے تو اس طرح کے بیان وزیراعظم صاحب خود دیا کرتے تھے۔
#نواززرداری نے لندن یا جیل میں دن گزارنے ہیں، وفاقی وزیر اطلاعات
پہلے تو آپ صرف جیل میں دن گزارنے کی اطلاع دیا کرتے تھے دونوں زعماء کے متعلق؟
#وزیر ہاوٴسنگ پنجاب میاں محمودالرشید کے بیٹے پر مقدمہ بنانے والے تینوں کانسٹیبل برطرف۔

(جاری ہے)

ہائی مورل گراوٴنڈ آف گورننس اسے ہی کہتے ہیں ناں؟
#ق لیگ سے اختلافات سنجیدہ نہیں، فواد چودھری
آپ کو کوئی کام سنجیدگی سے کرنا بھی آتا ہے؟
#پاکستانیوں کو دبئی میں مفت کاروبار کرنے کی سہولت دینے کا اعلان۔
اس طرح کی سہولت پاکستانیوں کو پاکستان میں کب ملے گی؟
#ملک کا ڈھانچا پچھلی حکومتوں نے کھوکھلا کردیا ہے، وفاقی وزیر برائے منصوبہ بندی خسرو بختیار
اور آپ ان حکومتوں میں بھی وزیر ہوتے تھے ناں؟
#بلورانی باپ کا کیس لڑنے پر چلّو بھر پانی میں ڈوب مریں، شیخ رشید
شیخ صاحب آج کل ہفتہٴ خوش اخلاقی منا رہے ہیں۔

#روشن مستقبل کی بنیاد رکھ دی، ندیم افضل چن ترجمان وزیراعظم
سال پہلے تک آپ پیپلزپارٹی کے جیالے ترجمان کی حیثیت سے ایسی ہی خوش خبریاں چھوڑا کرتے تھے۔
#سپریم کورٹ کے احکام پر عمل ہوتو کراچی کے مسائل حل ہوجائیں گے، مصطفی کمال
ایسا مگر کرے گا کون؟
#پنجاب میں طرزِ حکمرانی میں بڑی تبدیلیاں لانے کا فیصلہ
دوسرے بہت سے فیصلوں کی طرح یہ بھی ایک فیصلہ ہے جو عمل کو ترستا رہے گا۔

#وزیراعظم کی گورنر پنجاب کو اتحادیوں کو ساتھ لے کر چلنے کی ہدایت
گورنر صاحب اس طرح کی ہدایت پر عمل سے پہلے برادری دیکھتے ہیں شاید۔
#سانحہٴ ساہیوال: ریکارڈ میں تبدیلی کی تو سب جیل جائیں گے، عدالت عالیہ
ریکارڈ تو ایک طرف، اس سانحے میں تو قاتل تبدیل کرنے کی کوشش ہورہی ہے جناب۔
#ایم کیو ایم پاکستان حکومت کی کٹھ پتلی بن گئی، ڈاکٹر فاروق ستار
یہ کون سی نئی بات ہے!
#نوازشریف طبیعت بہتر ہونے پر دوبارہ جیل جائیں گے، وزیر اطلاعات پنجاب
یہ آپ کی پہنچ سے بہت اوپر کے معاملات ہیں جناب!
#نوازشریف نے این آر او مانگا نہ کبھی مانگیں گے، شاہد خاقان عباسی
کیوں کہ اس طرح کے کام شہبازشریف کے ذمے ہیں بقول شیخ رشید
#نوازشریف کو ملک کے ہسپتال پسند نہیں، فواد چودھری
اور آپ کو بالآخر ان کی پسند کا خیال رکھنا پڑے گا۔

#ہر صوبے میں ایک شادی کا سوچ رہا ہوں، بلاول
ایسے کاموں کے متعلق صرف سوچا ہی جاسکتا ہے آپ کے طبقے میں۔
#وفاق نے فنڈز کی فراہمی کم کردی، کام کیسے چلے گا، وزیراعلیٰ سندھ
کسی فالودے والے، کسی ریڑھی چھابڑی والے سے بات کریں ناں۔
#نوازشریف ہسپتال، حمزہ بیرون ملک، معاملہ کیا ہے؟ سلمان غنی تجزیہ کار
کیا میانہ روی ہے تجزیہ کار صاحب کی!؟
#عدالتوں سے عجیب وغریب فیصلے آرہے ہیں، چیئرمین پیپلزپارٹی
آنے دیں، عمل کس نے ہونے دینا ہے ان فیصلوں پر۔

#خواجہ سعد رفیق کو بدترین سیاسی انتقام کا نشانہ بنایا جارہا ہے، ن لیگ
اور نوازشریف ”بہترین“ سیاسی انتقام کا شکار ہیں۔
#عثمان بزدار میں ایسا کیا ہے جو وزیراعظم ان کا ڈھٹائی سے دفاع کررہے ہیں، بلاول
سید قائم علی شاہ میں ایسا کیا تھا کبھی پوچھا ابا حضور سے؟
#حکومت بڑے ڈاکووٴں کے سامنے بے بس ہوچکی ہے، وزیر ریلوے
 لگتا ہے کچھ عرصے بعد آپ کہیں گے حکومت بڑے ڈاکووٴں سے مل چکی ہے۔