Tum Apne Ehed Ki Tareekh Likhte Ho, Urdu Nazam By Jameel Ur Rahman

تم اپنے عہد کی تاریخ لکھتے ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ازل سے سر زمین ِخواب پر پھیلے ہوئے قصے

خود اپنی رونمائی کے لئے اک دور چنتے ہیں

پھر اس کے بعد ہر قصہ

جب اُس کا دور آ جائے

مجسم ہوکے

اپنے دور کی تاریخ بنتا ہے

سبھی کہتے ہیں کہ تاریخ

اپنے آپ کو اکثر ہی دوہراتی ہے

لیکن بھول جاتے ہیں

نکل جائے جو موج ِ آب وہ لوٹا نہیں کرتی

مگر

ہر اک امڈتی لہر کے چہرے کے خال و خد

بہت مانوس لگتے ہیں

وہی آنکھیں ،وہی تیور

بدلنے میں جنہیں اک پل نہیں لگتا

یہ ممکن ہے

تمہارے خواب کا قصہ

ابھی تک منتظر ہو اپنی باری کا

تمہارے عہد کی تاریخ

لمحوں کی مسافت میں

ابھی تک خیمہ زن ہو

اور سر ِ دشت ِ طلب

اپنے چراغ ِ عمر کی لرزیدہ لو کی طرح

شام ِ خفتگا ں کے روبرو پلکیں جھپکتی ہو

یہ ممکن ہے

تمہاری ذات کے خارج میں جو کچھ ہے

تمہاری ذات کے باطن سے

اُس کا کوئی رشتہ یا تعلق ہی نہ بنتا ہو

تم اپنے عہد کی تاریخ کو

تاریخ کی تکرار کہتے ہو

تم اپنے ہاتھ سے ہر عہد کی تاریخ لکھتے ہو

تم اپنی آنکھ سے ہر عہد کا منظر دکھاتے ہو

مگر یہ بھول جاتے ہو

تمہارے خواب کا قصہ ابھی تک

منتظر ہے اپنی باری کا!!!!!!!!!!!!!!