Kal Raat Kayi Khawab Pareshaa Nazar Aaye, Urdu Ghazal By RAIS AMROHVI

کل رات کئی خواب پریشاں نظر آئے

جو شہر کہ آباد تھے ویراں نظر آئے

بکھری ہوئی روندی ہوئی لاشوں سے گزر کر

ٹوٹے ہوئے مینار شہیداں نظر آئے

کہسار ہمالہ کی جھلک خواب میں دیکھی

گنگا میں ابلتے ہوئے طوفاں نظر آئے

پہلے تو کسی قریۂ برباد میں ٹھہرے

آگے جو بڑھے گور غریباں نظر آئے

مہکی ہوئی اجداد کی خوشبو سے ہوائیں

ہر گام پہ آثار عزیزاں نظر آئے

جس گھر میں فرشتوں کی ضیا تھی اسی گھر میں

ارواح خبیثہ کے چراغاں نظر آئے

جو مطلع تقدیس محبت تھے وہ چہرے

خفگی کے سبب ہم سے گریزاں نظر آئے

ہم جن کو دغا دے کے کہیں بھاگ گئے تھے

وہ اہل حرم با سر عریاں نظر آئے

اک پیر مقدس کا ہیولیٰ نظر آیا

پھر ریش سفید و در دنداں نظر آئے

ہم جن کی پریشانیٔ خاطر کا سبب تھے

وہ عالم رویا میں پریشاں نظر آئے

اک دامن عصمت کی کرن دور سے پھوٹی

دامن پہ کئی گوہر غلطاں نظر آئے

تھی جس کے تبسم میں ملائک کی حلاوت

صد حیف کہ وہ خواب میں گریاں نظر آئے

اس شہر کو جو شخص کے مولد کا شرف ہو

وہ شخص اسی شہر میں مہماں نظر آئے

لب پر ہے رئیسؔ اپنے یہ مصرع کئی دن سے

کل رات کئی خواب پریشاں نظر آئے