Mere Sharafat Ko Tu Ne Pamal Kiya Mere Adatoon Ko Kharab Kiya, Urdu Ghazal By Sardar Zubair Ahmed

میر ی شرافت کو تُو نے پامال کیا میری عادتوں کو خراب کیا

تری عزت کے سوال نے مجھے ہر محفل میں لا جواب کیا

آہ ظالم ترے شعلہٴ ستم نے میرے دل کو کباب کیا

تجھے معلوم ہے اس شہر حُسن میں تیرا ہی کیوں انتخاب کیا

ترا حُسن بہت تھا مگر ترے گیسووٴں نے کامل ترا شباب کیا

عارض تک پہنچے تھے ،کہ تری جھیل چشم نے غرقاب کیا

اے صنم میرا شوق دید یہ سمندر بھی عبور کرنے والاہے

دل کی دیوانگی دیکھ پسلیوں کا پنجرہ بھی چُور کرنے والا ہے

اے شبنم تو میرے چمن میں کلیوں کی دل آزاری نہ دیکھ

میرا چمن محروم رعنائی ہے مگر تو چمن کی لا چاری نہ دیکھ

خزاں میں کلیوں کی تازگی عجب مگر تو یہ پُراسراری نہ دیکھ

اے بہار آبھی جا گلشن میں خزاں کی دل آزاری نہ دیکھ

اے ظالم رواں رکھ ظلم اپنا ، بیوفا صنم کی پاسداری نہ دیکھ

کاٹنا ہے تو کاٹ میرا سر بھی میری شان دستاری نہ دیکھ

جو غم روح کو تڑپا دے تری محفل میں وہ رقص ہے باقی

میری زباں میں طاقت شعر کا وجود ترے ظلم کا نقص ہے باقی

بلبل بھی اپنی داستان غم سناتے سناتے رو گئی

چمن بھی نہ ملا اسے اور اپنا ہمنشیں بھی کھو گئی

میرے گلشن میں آکر اپنے زخموں کو شبنم سے دھو گئی

جو ٹھنڈک پیدا ہوئی زخموں میں تو وہ بھی سو گئی

اس شب وصل کے بعد وہ واپس جو گئی

پھر وہ میرے چمن کے گل آتشیں کی اسیر ہو گئی

آہ میرا دل جس سے آشنا تھا وہ صراحی ٹوٹ گئی

قصور فقط یہ تھا تری آنکھوں میں دیکھتے ہوئے صراحی چھُوٹ گئی

تُو تو صرف ظالم ٹھہرا مگر ہم ظلم شنا س ہیں

میرے خون دل میں بھی تری خوشبو کے احساس ہیں

تری فضائے دل میں بھی سحاب حسرت و یا س ہیں

ناداں تو کیا جانے کہ ہم بھی ترے دل کے پاس ہیں

جن میں پیتے رہے تم جام غم ،ہم وہی طاس ہیں

رقم ہے جس پہ تری داستان ستم ہم وہی قرطاس ہیں

سحر بھی ہو گئی اور آسماں پہ اب کوئی ستارہ نہیں

رات بھر سے ترا دل مچل رہا ہے مگر تری آنکھوں میں اشارہ نہیں