حکومت کی کرپٹ عناصر کیخلاف کارروائیاں اور مہنگائی کی بڑھتی لہر

 اظہر سلیم مجوکہ
وزیراعلیٰ پنجاب عثمان بزدار سے ان کے والد فتح محمد بزدار کی وفات پر حکومتی اور سیاسی اراکین کی تعزیت کا سلسلہ جاری ہے ان کے والد کی قل خوانی میں کاروباری اور عوامی شخصیات نے بھی بھر پور طریقے سے شرکت کی ہے ۔وفاقی حکومت ابھی تک مہنگائی اور بے روزگاری کے طوفان کو روکنے میں کامیاب نہیں ہو پائی جبکہ ڈالر اور پٹرول کی قیمتوں میں اضافے اور آئی ایم ایف کی شرائط پر بجلی کی قیمتوں میں حالیہ اضافے پر بھی سیاسی اور عوامی حلقوں میں خاصی تشویش پائی جارہی ہے ۔

باخبر ذرائع کے مطابق حکومت دیوالیہ ہونے سے بچنے کیلئے آئی ایم ایف کی امداد وصول کرنے والی ہے جس کے نتیجے میں مہنگائی کا ایک اور ریلہ عوام کیلئے مزید مسائل کا باعث بنے گا تاہم سنجیدہ عوامی حلقوں کے مطابق اگر تحریک انصاف کی حکومت ایک سال کی مدت میں عوامی مسائل پر قابو پانے میں کامیاب ہو جائے تو عوام مشکلات کا ذہنی طور پر سامنا کرنے کو تیار ہیں دوسری طرف تحریک انصاف کے شاہ محمود قریشی اور جہانگیر ترین کے درمیان اختلافات ایک بار پھرشدت اختیار کر گئے ہیں ۔

(جاری ہے)

مخدوم شاہ محمود کی پریس کانفرنس پروزیراعظم عمران خان نے بھی تحفظات کا اظہار کیا ہے جبکہ پارٹی میں کئی رہنما بھی جہا نگیر ترین کی حمایت پر اتر آئے ہیں اور وزیراعظم عمران خان کا وزن بھی جہانگیرترین کے پلڑے پر ہے ۔بعض ذرائع اس حالیہ لڑائی کو ایجنسیوں اور اسٹیبلشمنٹ کی کارروائی بھی قرار دے رہے ہیں اور کچھ حلقو ں کے نزدیک شاہ محمود قریشی وزارت عظمی کے امید وار کی حیثیت سے بھی سامنے لائے جا سکتے ہیں جبکہ کچھ حلقے میاں شہباز شریف اور نواز شریف کی بھی باتیں کررہے ہیں تاہم ایسی صورتوں میں عمران خان کے لیے جہاں مسائل درپیش ہو سکتے ہیں وہاں عمران خان بھی ایسی صورت کو کسی طور قابل کرنے کے حق میں نہیں ہوں گے۔

عوامی حلقوں اور تحریک انصاف کے قریبی حلقوں کے مطابق حکومت کو عوامی تو قعات پر پورا اترنے کیلئے کئی سخت فیصلے کرنا ہوں گے ۔قابل افراد کو حکومت میں شامل کرنے کے ساتھ ساتھ سابقہ حکومتوں کی لگائی گئی بیورو کریسی کو بھی لگام دینا ہو گی۔
پنجاب حکومت کی طرف سے بلدیاتی نظام کا حتمی منصوبہ تیار کر لیا گیا ہے ۔ذرائع کے مطابق وزیراعظم عمران خان کی منظوری کے بعد پنجاب اسمبلی میں بل پیش کیا جائے گا حکومت پنجاب کے بلدیاتی نظام میں وزارت بلدیات اور وزارت قانون کی مشاورت سے متعدد مرتبہ تبدیلیوں کے بعد اب پنجاب میں بلدیاتی نظام لانے کا فیصلہ کیا ہے ۔

وزیر اعظم کی منظوری کے بعد الیکشن کی نئی تاریخ کا اعلان بھی کیا جائے گا۔
زکر یا یونیورسٹی ملتان کے سابق وائس چانسلر ڈاکٹر طاہر امین کی وفات پر زکریا یونیورسٹی ملازمین اور عوامی وسیاسی حلقوں کی طرف سے افسوس کا اظہار کیا گیا ہے یونیورسٹی کی ٹیچر ز فورم کے تعزیتی اجلاس میں سابق وائس چانسلر کی یونیورسٹی کیلئے کی جانے والی کاوشوں کو سراہا گیا ہے ۔

جنوبی پنجاب میں بھی مسلم لیگ(ن)کے کارکنوں اور رہنماؤں کی طرف سے شہباز شریف اور حمزہ شہباز شریف کے گھر نیب کے چھاپے کی سخت مذمت کرتے ہوئے مطالبہ کیا گیا ہے کہ نیب انتقامی کارروائیاں بند کرے۔شہزاد مقبول بھٹہ،بلال بٹ،اطہر ممتاز،شاہد لودھی اور دیگر بھی احتجاجی مظاہرے میں شامل تھے۔
ملک میں ایک طرف نئے تعلیمی سال کا آغاز کر دیا گیا ہے اور دوسری طرف پنجاب ٹیکسٹ بک بورڈ کی پہلی سے انٹر تک کی کتابیں بھی مارکیٹ میں نایاب ہو گئی ہیں صوبائی وزیر صحت یاسمین راشد نے اپنے دورہ ملتان میں انصاف ہیلتھ کارڈ کے اجرا کے موقع پر خطاب کرتے ہوئے کہا ہے کہ تحریک انصاف کی حکومت غریب عوام کو صحت کی سہولتیں فراہم کرنے کیلئے ہر ممکن کوشش کررہی ہے تاہم محدود وسائل کی وجہ سے تمام افراد کو مفت ادویات کی فراہمی ناممکن ہے ۔

جمعیت علمائے اسلام پنجاب(ف)کی مجلس عمومی کے سابق رکن حافظ ایوب قریشی کے مطابق نشتر ہسپتال ملتان کے کارڈیالوجی وارڈ میں جان بچانے والی ادویات دستیاب نہیں ہیں۔
ملتان میں امن وامان کی صورتحال ایک بار پھر تشویشناک نظر آرہی ہے گول باغ گلگت میں گزشتہ دنوں دو گروپوں میں تصادم اور فائرنگ کے نتیجے میں ایک شخص قتل اور تین زخمی ہونے کے بعد پولیس نے 8
افراد کو گرفتار بھی کیا ہے ۔

واقع کی سنگینی کا انداز ہ اس بات سے لگایا جا سکتا ہے کہ نشتر ہسپتال کے ایمر جنسی وارڈ میں دونوں گروپ پھر لڑ پڑے اس موقع پر ہسپتال کے سکیورٹی گارڈوں کی کار کردگی بھی ایک سوالیہ نشان ہے جبکہ ضلعی انتظامیہ اور اعلی پولیس حکام کو اس واقعی کا سنجیدگی سے نوٹس لیتے ہوئے اس قسم کے واقعات کے تدارک کا انتظام کرنا چاہیے تاکہ کوئی بھی شہری قانون کو ہاتھ میں نہ لے اور ہسپتالوں میں اس قسم کی نازک صورتحال پیدانہ ہو اور دوسرے مریضوں اور ان کے لواحقین کو اس قسم کے واقعات کا سامنانہ کرنا پڑے۔

ڈسٹرکٹ بار ایسوسی ایشن ملتان کے زیراہتمام جشن بہاراں کی تقریب سے خطاب کرتے ہوئے ڈسٹرکٹ اینڈ سیشن جج سہیل اکرام نے کہا ہے کہ اس قسم کی تقاریب وکلا کی صحت مندانہ سر گرمیوں کے ذرائع میں اہم کردار ادا کرتی ہیں ۔انہوں نے وکلا پر زور دیا کہ وہ عوامی مسائل کے حل کیلئے اپنا بھر پور
کر دار اداکریں۔جماعت اہل سنت پاکستان کے امیر علامہ سید مظہر سعید کاظمی نے ملتان میں سالانہ عظیم الشان شہنشاہ بغداد کانفرنس کے صدارتی خطاب میں کہا ہے کہ حضرت شیخ عبدالقادر جیلانی کی تعلیمات ہمارے لئے مشعل راہ ہیں ۔

اس موقع پر نامور عالم دین مولانا ثمر عباس قادری نے اسلامی جمہوریہ پاکستان کے صدر کی طرف سے ایک اداکارہ کو ایوارڈ سے نواز نے پر بھی احتجاج کیا ۔کبیر والا کے سیاسی اور عوامی حلقوں کی طرف سے ایک مقامی سیاست دان کی غیر قانونی ہاؤسنگ سکیم میں میپکو کی طرف سے میٹر اتارنے پر علاقے کے مکینوں کی طرف سے احتجاج کرتے ہوئے کئی گھنٹے ٹریفک جام رکھی گئی ہے تاہم میٹر واپس لگوانے کی یقین دہانی پر احتجاج ختم کر دیا گیا ہے ۔سابق وزیر اعظم سید یوسف رضا گیلانی کے دور میں ایکوائر کی گئی اراضی کا ریکارڈ صوبائی ہائی ویز کے دفتر سے غائب ہونے کا نکشاف ہوا ہے ،ذرائع کے مطابق لینڈ ایکوزیشن پرانچ کے اہل کاروں نے کروڑوں روپے کی بوگس ادائیگیوں کا آڈٹ ریکارڈ بھی غائب کر دیا ہے ۔

ادارہ اردوپوائنٹ کا مضمون نگار کی رائے سے متفق ہونا ضروری نہیں ہے۔