" 25 سالہ سیاسی جدو جہد "‎

 پاکستان تحریکِ انصاف کا25 واں یومِ تاسیس منایا جا رہا ہے۔ عمران خان اپنی قومِ یوتھ اور اپنے کاروان میں شامل دیگر لوٹوں سے اپنی 25 سالہ سیاسی "جدو جہد" کی مبارک بادیں وصول کر رہے ہیں۔
تین سال قبل یعنی دو ہزار اٹھارہ کے الیکشن کے پری پلان نتیجے میں عمران نیازی اور اِن کی پاکستان تحریکِ انصاف کو جب کچھ ریٹائرڈ اور چند حاضر سروس”سہولت کاروں“ سے ایک مخصوص عالمی ایجنڈے کے تحت کٹھ پتلی حکومت دلوائی گئی تو اس وقت پاکستان کاجی ڈی پی گروتھ5.8 فیصد تھا اور آئی ایم ایف کو خیر آباد کہا جا رہا تھا۔

آج کی تاریخ میں کٹھ پتلی نیازی اور باجوہ ڈاکڑرائن کے جوائنٹ ایڈ ونچر”نیا پاکستان“ کا گروتھ ریٹ1.5 فیصد ہے جو کہ دنیا کے سب سے تھکے ملک نائجیریا کی معیشت کے برابر ہے جبکہ ملک اس وقت غیر ملکی قرضوں کے سمندر میں ڈوب چکا ہے اور ان بھاری اور مہنگے کھربوں ڈالرز کے قرضوں کی واپسی کے لیئے ایٹمی پروگرام گروی رکھنے یا رول بیک کرنے کی باتیں کی جا رہی ہیں۔

(جاری ہے)

مہنگائی کی تشویشناک شرح 18.43فیصد سے زائد ریکارڈ کی گئی ہے جو 2018کے اختتام پر 6.21 فیصد سے کم تھی۔یہاں یہ بھی یاد رہے کہ 2021 میں ہمارے ازلی دشمن بھارت کا جی ڈی پی گروتھ ریٹ 11.5 فیصد رہے گا۔
25 اپریل1991 میں وزیرِا عظم نواز شریف سے شوکت خانم کینسر ہسپتال کا افتتاح کروایا،جبکہ اس وقت مسلم لیگ کی ہی پنجاب حکومت سے اپنی والدہ مرحومہ کے نام پر کینسر ہسپتال بنانے کے لیئے سینکڑوں کنال سرکاری زمین الاٹ کروائی اور شریف خاندان بشمول اسحق ڈار سے بھاری نقد عطیات وصول کیئے۔

92 کرکٹ ورلڈ کپ اور عوامی خیرات اور زکواۃ کے زریعے چلنے والے خیراتی شوکت خانم کینسر ہسپتال کی شہرت کی آڑ میں سیاست بازی شروع کرنے اور پھر 25 سال بعد اپنے آپ کو بلعموم دنیا اور بلخصوص امتِ مسلمہ کا بڑا لیڈر سمجھنے والا جب غیر ممالک میں جا کر اپنے ہی ملک کی سیاسی قیادت کو بغض میں آ کر چور اور ڈاکو قرار دے اور پھر ان ہی ممالک سے بھیک مانگنے کے لیئے کشکول آگے کر دے.
اسٹیج پر کھڑے ہو کر پاکستان کے بارہ موسموں،جرمنی جاپان کی سرحدیں ایک ہونے،راتوں میں درختوں کے آکسیجن خارج کرنے کی بات کرے اور اپنے ہاتھوں سے تباہ کردہ ملکی معیشت کی دوبارہ بہتری کے لیئے انڈے و مرغیاں پالنے،زیتوں، بھنگ،زعفران کاشت کرنے کٹّے،بھینسیں بیچنے اور پالنے جیسے مشورے دینے لگے اور لیڈر ہذا ........ جب کورونا وائرس کو کنٹرول کرنے میں بری طرح ناکامی کے بعد اب عام پبلک پر صرف ایک ماسک استعمال کرنے کی پابندی کے لیئے فوج کا استعمال شروع کر دے تو پھر اس لیڈر نے گزشتہ پچیس سالوں میں سیاسی”یدو یہد“ نہیں کی تو کیا کیا  ہے؟
خان صاحب اب فرما رہے ہیں کہ ’’ڈھائی سال کی”کارکردگی“ پر فخر ہے‘‘ فخر کیوں نہ ہو۔

ابھی تک پوری کامیابی کے ساتھ عالمی ایجنڈا پورا کیا اور جو اہداف باقی رہتے ہیں انہیں بھی پایہِ تکمیل تک پہنچانے کے لیئے پوری تن دہی کے ساتھ محنت جاری ہے۔ مقبوضہ کشمیر اور پاکستان کے نام پر بھارتی فوج کی گولیاں اپنے سینوں پر کھانے والے کشمیری عوام کی بھارت کے ساتھ سودے بازی کی،قادیانیوں کو سرگرمیاں جاری رکھنے کے لیئے راہ ہموار کی، ملک کو مقروض ترین بنا کر قومی معیشت کو آئی ایم ایف کے حوالے کیا،پاکستان کا گیم چینجر سی پیک منصوبہ بند کیا،اداروں کو متنازعہ بنایا، خارجہ پالیسی کا بیڑہ غرق کر کے ملک کو اقوامِ عالم میں تنہا کیا،ملک میں بے روزگاری عام کی،مہنگائی کو بامِ عروج پر پہنچایا،
ایک ایٹمی ملک کے وزیرِ اعظم ہوتے ہوئے بھینسیں،کٹّے اور مرغیوں کے پالنے اور بھنگ کاشت کرنے جیسے مشوروں سے لے کر کشکول اٹھائے لنگر خانوں کا افتتاح کیا جس سے ملکی وقار شدید مجروح ہوا۔

اسی حکومت کے جاری کردہ اعداد و شمار کے مطابق صرف حالیہ فخر والے ڈھائی سالوں میں ملک کی معیشت جنگ زدہ افغانستان اور شورش زدہ ملک نائیجیریا سے بھی پیچھے رہ گئی ہے۔
معلوم نہیں اس ملک کے وزیرِ اعظم کو اپنی کون سی والی”کارکردگی“ پر فخر کرنے کا دورہ پڑا ہوا ہے؟