بھارت نے ٹیسٹ کرکٹ کی 148 سالہ تاریخ کا شرمناک ریکارڈ اپنے نام کر لیا

انگلینڈ کیخلاف لیڈز ٹیسٹ کے دوران بھارتی گیند بازوں اور فیلڈرز نے اپنی ٹیم کو تاریخی شرمندگی سے دوچار کر دیا

محمد علی بدھ 25 جون 2025 23:54

ہیڈنگلے (اردو پوائنٹ تازہ ترین اخبار ۔ 25 جون 2025ء ) بھارت نے ٹیسٹ کرکٹ کی 148 سالہ تاریخ کا شرمناک ریکارڈ اپنے نام کر لیا، انگلینڈ کیخلاف لیڈز ٹیسٹ کے دوران بھارتی گیند بازوں اور فیلڈرز نے اپنی ٹیم کو تاریخی شرمندگی سے دوچار کر دیا۔ تفصیلات کے مطابق انگلینڈ کیخلاف لیڈز ٹیسٹ میچ میں 5 وکٹوں سے شکست کے ساتھ ہی بھارتی ٹیم نے 148 سالہ تاریخ کا ناپسندیدہ ترین ریکارڈ اپنے نام کروالیا۔

گزشتہ روز انگلینڈ نے لیڈز ٹیسٹ میچ کے پانچویں روز سنسنی خیز انداز میں 5 وکٹوں پر 371 کا ہدف باآسانی سے حاصل کیا اور سیریز میں 0-1 کی برتری حاصل کی۔ اس میچ میں پہلے بیٹنگ کرتے ہوئے بھارت نے پہلی اننگز میں 471 رنز کا مجموعہ بورڈ پر سجایا، جس میں یشسوی جیسوال 101، شبمن گل 147 اور رشبھ پنت 134 بنانے میں کامیاب ہوئے۔

(جاری ہے)

اسی طرح دوسری اننگز میں بھی رشبھ پنت نے 118 اور کے ایل راہول نے 137 رنز بنائے، یوں بھارت کی دونوں اننگز میں 5 بیٹرز نے سینچریاں اسکور کیں تاہم اس کے باوجود وہ ٹیسٹ میچ ہارنے والی دنیا کی پہلی ٹیم بن گئی۔

148 سالہ ٹیسٹ کرکٹ کی تاریخ میں پہلی بار ہوا ہے کہ کسی ٹیم دونوں اننگز 5 سنچریاں اسکور کی ہوں لیکن اسکے باوجود میچ ہارا ہو۔ اس سے قبل ہارے ہوئے ٹیسٹ میچ میں سب سے زیادہ سنچریوں کا پچھلا ریکارڈ 4 تھا، جو آسٹریلیا نے 1929ء میں میلبرن میں انگلینڈ کے خلاف حاصل کیا تھا، اس ناپسندیدہ ریکارڈ کو تقریباً 96 سے زائد کا عرصہ گزر چکا ہے۔ میچ میں انگلینڈ کی فتح نے بھارتی ٹیم کے بولرز پر سوال اُٹھادیا ہے، جسپریت بمراہ کپتانی کو لیکر پہلے ہی ہیڈلائنز میں ہیں کیونکہ بھارتی بورڈ نے انہیں نظر انداز کرکے نوجوان شبمن گل کو قیادت کی ذمہ داری سونپ دی ہے۔