رامیش پانڈے سے بات کرکے میں ذہنی طور پر تناؤ میںآ گیا تھا ، میں نے دعوی کر لیا تھا، مجھے یقین تھاکہ جیسا میں نے کہا ہے ویسا ہو جانا ہے ، لیکن ممکن ہے وقت آ گے پیچھے ہو جائے۔ میں کچھ دیر اس بارے سوچتا رہا ، پھر اچانک میرے ذہن میں سارا پلان آ تا چلاگیا۔ بس مجھے چند چیزیں کنفرم کرنا تھیں۔ وہ میں نے فہیم اور اروندکو بتادیں۔ انہوں نے مجھے دوپہر تک اس بارے کنفرم کر دینے کا وعدہ کر لیا تھا۔
میں ناشتہ کر کے چھت پر چلا گیا۔ میں جانتا تھا کہ میرا تناؤ کھلی فضا میں دور ہوتا ہے ۔ میرے لاشعور میں کہیں تھا کہ میں نے کسی کو چیلنج دیاہے ، اسے پورا کرنا ہے۔ میں نے ایک دم سے رامیش پانڈے کو ذہن سے نکال باہر کیا اوراس کی جگہ انوجیت سنگھ کے بارے میں سوچنے لگا جو سیاست کے میدان میں کودنے والا تھا۔
(جاری ہے)
اچانک میرے من میں آیا کہ سیاسی نظام کو چلانے والے آخر لوگ ہی تو ہوتے ہیں۔
جب تک ٹھیک اور درست بندے نہ آئے ، اس وقت تک نظام درست چل ہی نہیں سکتا۔ میرا دھیان اپنے ہی سیاسی نظام کی طرف چلا گیا جہاں سوائے کرپشن، جھوٹ اور استحصال کے اور کچھ دکھائی نہیں دے رہا تھا۔ میرا دل کیا کہ اس سیاسی نظام میں اچھے لوگوں کو آنا چاہئے ، مگر کیسے؟ یہ ایک اُلجھا ہوا سوال تھاَ جس کا جواب بہر حال موجود تھا، فوری طور پر میرے ذہن میں نہیںآ رہا تھا۔
میں نے سوچا کہ اشفاق کو اپنے علاقے سے ایم این اے الیکشن لڑوا دیاجائے۔ اس بارے اس نے سوچا بھی نہیں ہوگا۔ جب تک عام عوام یہ سمجھتی رہے گی کہ یہ کام چند مخصوص خاندانوں کا ہے ، یہ عوام اسی طرح پستی رہے گی۔ چونکہ اس نظام کو لوگوں ہی نے بدلنا ہے ، اس لئے لوگ بھی اچھے ہی لائیں جائیں۔ میری سوچ اس طرف چل پڑی۔ ایسے میں کرنل سرفراز کا فون آ گیا۔
” کیا ہو رہا ہے؟“
” ایویں ہی کچھ سوچیں سوچتا چلاجا رہا تھا یہاں کی سیاست کے بارے میں۔“ میں نے کہا
” مثلاً کیا۔“ انہوں نے دلچسپی لیتے ہوئے پوچھا تو میں نے اختصار سے بتا دیا ، تب انہوں نے کہا،” میں نے اس پر بہت سوچا ہے اور میرے پاس ایک پلان بھی ہے۔ اس بارے میں تم سے میں بات کرتا۔لیکن ابھی تم نے جو رامیش پانڈے کو چیلنج دیا ہے ، اسے پورا کرنا اور پوری سنجیدگی سے کرنا ہے ۔
“
” ہو گیا، اس بارے آپ کے جو ذہن میں ہے، میں وہ ضرور سننا چاہوں گا۔“ میں نے جواب دیتے ہوئے کہا
” میں نے کچھ معلومات تجھے میل کر دی ہیں۔ اسے دیکھو، یہ نوتن کور گروپ کے بس کی بات نہیں ہوگی۔ تم ونود رانا سے رابطہ کرو ، میں بھی کچھ کرتا ہوں۔“ انہوں نے راستہ دکھاتے ہوئے کہا
” اوکے ۔“ میں نے کہا تو انہوں نے فون بند کر دیا۔
میں چھت سے اتر کر نیچے اس کمرے میںآ گیا جہاں فہیم بیٹھا ہوا تھا۔ میں نے اس سے لیپ ٹاپ لیا اور میل دیکھنے لگا۔کچھ دیر بعد میں نے لیپ ٹاپ بند کیاا ور چند لمحے سوچنے کے بعد بانیتا کور سے رابطہ کیا۔
” ہائے ظالم ۔! یہ میری قسمت ہے کہ تم نے مجھے اس قابل سمجھا کہ مجھ سے بات کرو، یقین جانو بڑا مس کرتی ہوں تمہیں، بولو کیا حکم ہے میرے لئے۔
اب یہ مت کہنا کہ کوئی حکم دینے کے لئے نہیں صرف تم سے بات کرنے کو جی چاہا تھا۔“ اس نے ایک دم سے شوخی بھرے لہجے میں کہا تو میں نے ابھی اسی انداز میں کہا
” یار تم تو گیانی ہو گئی ہو۔ اب تو کہنے سے پہلے ہی من کی بات جان جاتی ہو۔“
” بولو ، بات کیا ہے۔“ اس نے کافی حد تک سنجیدہ ہوتے ہوئے پوچھا تو میں نے اسے رامیش پانڈے سے ہونے والی ساری بات بتا دی
” کرنا کیا ہے ؟“ اس نے پوچھا
” تم ونود رانا سے بات کرو ، کہو میں اس سے بات کرنا چاہتا ہوں۔
پھر جو بھی بات ہوگی تمہارے سامنے ہو جائے گی۔“ میں نے اس سے کہا
” میں اس سے رابطہ کرتی ہوں۔“ اس نے کہا اور فون بند کر دیا۔میں انتظار کرنے لگا ، تقریباً دس منٹ کے بعد اس نے کال کرکے بتایا کہ وہ خود بات کرنا چاہتا ہے۔ میں نے کانفرنس کال میں دونوں کو لے لیا۔کچھ دیر تمہیدی باتوں کے بعد میں نے پوچھا
” کیا تم جگجیت بھر بھرے کا انتقام لینا چاہتے ہو ؟ اس سیٹ اپ کو ختم کرنا چاہتے ہو جو رامیش پانڈے نے بنا دیا ہے؟ یا خاموشی سے اپنی نوکری کرنا چاہتے ہو؟“
” مجھے خود سمجھ نہیںآ رہی کہ مجھے کیا کرنا ہے۔
میں دلبرداشتہ ہو چکا ہوں۔ “ وہ مایوسی سے بولا
” میرے کہنے پر ایک بار اپنے پاؤں پر کھڑے ہو جاؤ۔ حوصلہ پکڑو۔ ایک بار پھر سے فتح یاب ہو جاؤ۔“ میں نے اسے حوصلہ دیتے ہوئے کہا
” کیسے کوئی راستہ ہی نہیں ہے؟“اس نے پھر اسی مایوسی میں کہا
” دیکھو ونود ،میں نے اسے چوبیس گھنٹے کا وقت دیا ہے ، جس میں سے ایک گھنٹے سے زیادہ وقت گذر چکا ہے ، اس دوران اس نے پرائم منسٹر سیکٹریریٹ سے بھی رابطہ کر لیا ہے۔
وہ اپنے بندو بست میں لگ گیاہے۔ اسے یہ اندازہے کہ میں ایسا کر سکتاہوں تو اس پر خوف طاری ہے۔ میں مانتا ہوں کہ خوف زدہ انسان بہت خطرناک ہوتا ہے، اسے اپنے سائے سے بھی ڈر لگتا ہے، لیکن ظالم اندر سے انتہائی بزد ل ہوتا ہے۔ اس کے بندو بست ہی اسے لے ڈوبتے ہیں۔ میری بات سمجھ رہے ہو۔“
” میں سمجھ گیا، مجھے کیا کرنا ہے، بولو تم کیا چاہتے ہو۔
“اس نے ایک دم سے چونکتے ہوئے پوچھا۔ اس کے لہجے میں جوش بھرا ہوا تھا۔
”بس اسے گھیر کر رکھو، اوپر سے جو بھی سیکورٹی کے لئے ہوگا، اس میں اپنے بندے داخل کر دو۔ باقی کام بانیتا کر لے گی، یہ ابھی ممبئی آ رہی ہے۔“ میں نے کہا تو بانیتا کور نے شوخی میں کہا
” ارے تم تو مجھے نارتھ پول جانے کا بھی کہو تو میں جانے کو تیار ہوں، یہ تو اپنی ممبئی ہے یار۔
“ یہ کہہ کر وہ کھلکھلا کر ہنس دی۔ تب میں نے کہا
” بس تم وہاں پہنچو، یہ ذہن میں رکھنا کہ یہی صرف تمہارا آپریشن ہو گا۔ اس میں جسپال کہیں نہیں ہے۔“
” وہ کیا ہر پریت کے پاس ہے؟“ اس نے پوچھا
” ہاں وہ ادھر ہی ہے ، میں نے خود اسے وہیں رکنے کو کہا ہے ۔“ میں نے جواب دیا
” کاش تو بھی میرے پاس ہوتا۔“ اس نے حسرت سے کہا تو میں ایک دم سے بولا
” یہ کل تک ختم کرو، پر سوں میرے پاس ہوگی تم۔
“
” مجھے معلوم ہے یہ تم اپنی بات سچ کر دکھاؤ گے۔ کیا یہ آ ج رات نہیں ہوسکتا ممبئی والا کام ۔“ یہ کہہ کر وہ پھر ہنس دی۔ تو میں نے کہا
” میں نے اسے چوبیس گھنٹے کا وقت دیا ہے ، تم نکلنے کی تیاری کرو۔ ونود میں تم سے رابطے میں رہوں گا۔ تم سن رہے ہو نا۔“ میں نے پوچھا
” میں سن رہاہوں۔ جیسے ہی مجھے کو ڈیویلپمنٹ دیکھنے کو ملی میں آپ سے رابطہ کر لوں گا۔
“ اس نے جوش سے کہا
” نہیں، تمہیں ، میرا نمبر نہیں ملے گا ،میں خود کروں گا، یہ کہیں بھی ٹریس نہیں ہوگا۔ اب تم اپنی آ نکھیں کھول لو اور ٹھنڈے دماغ سے سوچنا شروع کر دو۔“
” اوکے ۔“ اس نے کہا تو میں نے رابطہ منقطع کر دیا۔
کچھ دیر بعد میں نے سب کو بتا دیا کہ میں کیا کرنے جا رہاہوں۔ سب لوگوں کی توجہ اس کام پر لگ گئی تھی۔
کچھ وقت گذرا تھا کہ کرنل سرفراز کا فون آ گیا۔
اس نے مجھے ایک فون نمبر دیتے ہوئے کہا
” یہ وہ جوان ہے ، جسے میں نے اس کام کے لئے چنا ہے جو تم چاہ رہے ہو۔ میں چاہتا تھا کہ اسے کندن بناؤں کیونکہ میں سمجھتا ہوں کہ یہ ابھی کندن نہیں بنا ، ابھی اسے بھٹی میں ڈالنا ہے، ڈال سکتے ہو تو یہ کام اپنے ذمے لے لو، اس کی تمام تر ذمہ داری تمہیں خود پر لینا ہوگی۔اگر یہ تمہیں اپنے مطلب کا بندہ نہ لگے تو…“
” وہ اگر آپ نے چنا ہے تو وہ اس قابل ہوگا۔ میں تیار ہوں اسی کی ذمہ داری لینے کے لیے۔“ میں نے کہا
” میں نے اس کے بارے میں تمام ضروری معلومات ای میل کر دی ہیں۔ جب چاہے اسے بلالینا۔“ انہوں نے کہا اور فون بند کر دیا
