پنجا ب میں کو ئلے اور پانی سے1200میگاواٹ بجلی کے چھوٹے پیداواری یونٹ لگارہے ہیں، راجہ ریاض:
لاہور( اُردو پوائنٹ اخبار تازہ ترین ۔8اپریل ۔2010ء)سینئر صوبائی وزیر راجہ ریا ض احمد نے کہا ہے کہ کوئلے اور پانی سے 1200 میگا واٹ بجلی کے چھوٹے پیداواری یونٹ لگا رہی ہے ۔ اسی طرح توانائی کے بحران پر قابو پانے کے لئے نئے چھوٹے ڈیموں کی تعمیر پر تیزی سے کام جاری ہے ۔ ایک مقامی ٹی وی چینل کو انٹرویو دیتے ہوئے راجہ ریاض احمد نے بتایا کہ اس وقت پنجاب میں اناج کی کوئی کمی نہیں 950 روپے کی قیمت کے باوجود ہمارے پاس 30 لاکھ ٹن گندم کے ذخائر موجود ہیں ۔ انہوں نے کہا کہ کاشتکاروں کو گنے اور چاول کی بھی سرکاری قیمت میں اضافہ کر دیا گیا ہے ۔ انہوں نے کہا کہ حکومت کو تمام مسائل کا بخوبی احساس ہے اور اٹھارویں آئینی ترمیم کا مرحلہ طے ہونے کے بعد اب عوامی مسائل کے حل کے ٹریک پر آ گئے ہیں ۔ اوراب باقی ماندہ امور کو تیزی سے نمٹایا جائیگا۔راجہ ریاض احمد نے کہا کہ پنجاب میں مخلوط حکومت ایک نیا تجربہ ہے اور دو مختلف منشور کی حامل سیاسی جماعتوں کے مابین معاملات خوش اسلوبی سے حل کرنے کی کوشش جاری ہے ۔ انہوں نے کہا کہ بعض مسائل ضرور موجود ہیں لیکن ہم معاملات کو بہتر سے بہتر کرنے کی کوشش کر رہے یں ۔ انہوں نے کہا کہ وسیع تر قومی اور جمہوری مفاد میں مخلوط حکومت کی مضبوطی وقت کا تقاضا ہے اور ہم اپنی قیادت کے احکامات کے پابند ہیں ۔ انہوں نے کہا کہ صدر مملکت کی طرف سے اپنے اختیارات سے دستبردار ہونا ایک شاندار روایت ہے ۔ جس کی ملکی سیاسی تاریخ میں مثال نہیں ملتی ۔ انہوں نے کہا کہ تمام سیاسی جماعتوں کومل کر قومی ایجنڈے پر اتفاق کرتے ہوئے موجودہ قومی مسائل کا حل تلاش کرنا ہو گا ۔