گھڑیاں ایک گھنٹہ آگے کرنے کے عمل سے تقریباً 200 میگا واٹ یومیہ بجلی کی بچت ہوئی ہے، راجہ پرویز اشرف:
اسلام آباد (اُردو پوائنٹ اخبار تازہ ترین۔12 اکتوبر ۔2009ء) وفاقی وزیر پانی و بجلی راجہ پرویز اشرف نے قومی اسمبلی کو بتایا ہے کہ گھڑیاں ایک گھنٹہ آگے کرنے کے عمل سے تقریباً 200 میگا واٹ یومیہ بجلی کی بچت ہوئی ہے۔ قومی واٹر پالیسی کی تشکیل کیلئے کام جاری ہے۔ بھارت کے ساتھ بگلیہار ڈیم کا مسئلہ حل کرنے کیلئے سیکرٹری سطح سے صدارتی سطح تک بات کی گئی ہے اور اب بھی یہ مسئلہ مسلسل اٹھایا جا رہا ہے۔ پیر کو وقفہ سوالات کے دوران ارکان کے سوال کے جواب میں انہوں نے بتایا کہ ملک میں بجلی کی لوڈ شیڈنگ کا مسئلہ حل کرنے پر خصوصی توجہ دی جا رہی ہے۔ ہمارا عزم ہے کہ ہم جلد از جلد لوڈ شیڈنگ پر قابو پائیں گے۔ انہوں نے کہا کہ حکومت نے ملک کے بارانی علاقوں میں زرعی آبپاشی کیلئے چاروں صوبوں اور واپڈا کو 32 سمال اور میڈیم ڈیمز کی تعمیر کی ذمہ داری تفویض کی ہے۔ فیز ون میں فاسٹ ٹریک کنٹریکشن کیلئے 12 ڈیموں کا انتخاب کیا گیا ہے جو کہ مائیکرو آبپاشی نظام کے ساتھ 16,35,584 ایکڑ اراضی کی آبپاشی کیلئے 2.5 ایم اے ایف پانی ذخیرہ کرنے میں معاون ثابت ہونگے ۔ انہوں نے بتایا کہ ان ڈیموں سے پانچ ڈیمز بلوچستان میں بنائے جائیں گے جو کہ 308396 ایکڑ اراضی کو سیرات کریں گے۔ تین ڈیمز سندھ میں تعمیر ہونگے جو 147040 ایکڑ اراضی کو سیراب کریں گے ۔ دو ڈیم صوبہ سرحد میں بنیں گے جو 114148 ایکڑ اراضی کو سیراب کریں گے جبکہ صوبہ پنجاب میں تعمیر ہونے والے دو ڈیم (گھبیر ڈیم، پاپن ڈیم) 66000 ایکڑ اراضی سیراب کریں گے۔ انہوں ن بتایا کہ مذکورہ منصوبے ٹینڈر کے مرحلہ میں ہیں۔ ایک سوال کے جواب میں وزیر پانی و بجلی نے بتایا کہ حکومت کوئلے کے ذریعے بجلی پیدا کرنے کی حصولہ افزائی کر رہی ہے حکومت گڈانی بلوچستان میں درآمد شدہ کوئلے پر مبنی ہزار بارہ سو میگا واٹ کے دو مربوط پاور پراجیکٹوں کے بارے میں کارروائی کر رہی ہے۔ عالمی بنک نے حکومت سندھ اور حکومت پاکستان کے ساتھ تعمیر استعداد اور لین دین کے مشورے کے بابت تھرکول اینڈ پاور فی امداد مالیتی 30 ملین امریکی ڈالر کے فنڈز کی فراہمی سے اتفاق کیا ہے جس کے نتیجے میں تھر کے بلاک ون میں ایک ہزار میگا واٹ کا ایک پاور پراجیکٹ قائم ہو گا۔